Polisi eneo la Kangonde, kaunti ndongo ya Masinga wanamsaka mwanamume mmoja anayeshukiwa kumuua mwajiri wake kwa kumnyonga na kisha kutoroka.
Akidhibitisha kisa hicho siku ya Jumatatu, chifu wa Kangonde, Sebastian Muia alisema kuwa maiti ya mwanamke huyo ilipatikana ikiwa na kamba shingoni huku ikiwa imefichwa mvunguni wa kitanda.
Muia alielezea kuwa mshukiwa amekuwa akiishi na mwajiri wake kwa muda mrefu hadi siku ya Jumapili pale alidai kutoka na kwenda kuandikisha laini ya simu katika soko lililo karibu.
"Majirani walipoamka walipata mlango wa ajuza huyo umefungwa upande wa nje na kudhani labda ameondoka kwenda katika shughuli zake,” alielezea Muia.
Inaripotiwa kuwa majirani walishikwa na wasiwasi walipokosa kumwona mama huyo wala mfanyikazi wake, na kuamua kuvunja mlango huo na hapo ndipo walipopata mwili wa marehemu ukiwa chini ya kitanda, ukiwa na kamba shingoni.
Chifu huyo aliwaomba wenyeji watakaopata habari zinazoweza kusaidia katika uchunguzi kupiga ripoti katika kituo cha polisi.