Polisi kutoka eneo la Joska, kaunti ndogo ya Matungulu, Kaunti ya Machakos, walimtia mbaroni mshukiwa mmoja baada ya kumpata na bangi siku ya Jumapili.
Akidhibitisha kisa hicho kupitia njia ya simu, Mkuu wa polisi wa Matungulu Bwana Joseph Chesire alisema kuwa mshukiwa huyo alitiwa mbaroni katika eneo la Waswa baada ya polisi kupewa habari kuwa mshukiwa alikuwa na bidhaa zilizoshukiwa kuwa bangi.
Askari walipofika katika nyumba ya mshukiwa na kufanya upekuzi, ndipo waligundua bangi ya uzani wa kilo 200 yenye dhamani ya Sh200,000.
"Polisi katika Kituo cha polisi cha Joska walipata habari kuwa kuna mtu anashukiwa kuwa na bangi ndipo maaskari walifika kwake nyumbani na kupata misokoto ya bangi na kumtia nguvuni,” alisema Bw Cheshire.
Mshukiwa huyo kwa sasa anazuiliwa katika Kituo cha polisi cha KBC huku akisubiri kufikishwa kortini siku ya Jumatatu.