Mwanamume mmoja anayeshukiwa kuwa mwizi wa mabavu alitiwa mbaroni siku ya Jumamosi katika eneo la Kalandini kaunti ndogo ya Kathiani kaunti ya Machakos.
Akidhibitisha kisa hiki naibu wa chifu wa kata ndogo ya Kalunga Boniface Kiilu alisema kuwa maduka mengi katika eneo hilo yamekuwa yakivunjwa na bidhaa pamoja na pesa kuibiwa pasi na washukiwa kutiwa mbaroni.
Aidha, Kiilu alielezea kuwa kutokana na wizi uliotekelezwa siku ya Ijumaa usiku katika duka moja na shilingi elfu arobaini na tatu kuibiwa maafisa was polisi walianzisha uchunguzi kusaka washukiwa.
Polisi walipofika katika nyumba ya mshukiwa walipata baadhi ya bidhaa zilizoibiwa kutoka dukani hilo na shilingi elfu kumi na saba na mia sita.
"Mshukiwa ni mwizi sugu ambaye amewahangaisha maafisa was polisi sana ila siku zake arobaini zimewadia," alisema Kiilu.
Vilevile aliwashukuru wakaazi wa eneo hilo kushirikiana na polisi ili kuhakikisha mshukiwa ametiwa mbaroni.
Isitoshe Kiilu alisema kuwa mwanamume huyo anazuiliwa katika kituo cha polisi cha Kathiani huku akisubiria kufikishwa kortini hapo siku ya Jumamosi wiki ijayo.