Mwili wa mtoto mvulana mwenye umri wa miaka 13 umepatikana katika Mto Gucha wilayani Masaba Kaskazini, kaunti ya Nyamira.
Kulingana na chifu wa lokesheni ya Rigena kaunti ya Nyamira, Mireri Mokua aliyetibithisha kisa hicho alisema Mtoto huyo kwa jina Victor Osoro alikuwa mwanafunzi wa darasa la saba katika shule ya msingi ya Kegogi.
Mokua aliongeza kwa kusema kuwa mtoto huyo alikuwa na watoto wengine walipoenda kuogelea katika Mto Gucha na kwa bahati mbaya maji yakamzidi na akafariki.
“Kifo cha mtoto huyu ni cha kutatanisha sana haswa kwa wazazi na kwa wakaazi wa eneo hili maana alikuwa anaogelea kwa bahati mbaya maji yakamzidi na akafariki,” alisema Mokua.
Wakati huo huo, Chifu Mokua aliwaomba wazazi kuwa waangalifu kwa watoto wao kwa chochote wafanyacho kuhakikisha maisha yao yako katika hali salama.
Maafisa wa polisi wa kituo cha Keroka walipeleka mwili wa mtoto huyo katika chumba cha kuhifadhi maiti cha Keroka.