Katibu wa serikali ya kaunti ya Kisii Johnstone Ndege amewapa wafanyibiashara wote mjini Kisii makataa ya siku tatu kuimarisha usafi mahali wanapofanyia biashara zao la sivyo waondolewe mahala hapo.
Hili linajiri huku zikiwa simesali siku chache kabla ya kungoa nanga kwa kongamano la kibiashara katika chuo kikuu cha Kisii, ambapo idadi kubwa ya wageni wanatarajiwa kuhudhuria.
Akizungumza siku ya Jumatatu mjini Kisii, Ndege alisema wafanyibiashara wote wa vibanda mjini humo hawatazingatia usafi wa hali ya juu huenda siku ya Ijumaa vibanda vyao viondolewe.
“Siku ya Ijumaa tutatembea katika mji mzima wa Kisii ili kuona ikiwa hali ya usafi imezingatiwa, la sivyo wanabiashara ambao hawajaimarisha usafi wataondolewa maana tunahitaji usafi kuwa katika mji wetu haswa ikizingatiwa wageni wa kibiashara watahudhuria kongamano la kibiashara,” alisema Ndege.
Kongamano hilo la kibiashara litanza tarehe 24 hadi 26 mwezi huu katika chuo kikuu cha Kisii.