Rais Uhuru Kenyatta amepongezwa kwa kutimiza ahadi ya kuwapa wanafunzi wa darasa la kwanza vipakatalishi ambavyo watatumia kuwasaidia kusoma shuleni.
Hii ni baada ya shule tatu katika kaunti ya Nyamira kupokea vipakatalishi hivyo mnamo siku ya Jumanne huku shughuli hiyo ikipongezwa kwa furaha za aina yake.
Akizungumza katika shule ya msingi ya Nyamira naibu mwalimu mkuu wa shule ya msingi ya Nyamira DEB Annah Momanyi alimpongeza Rais Uhuru Kenyatta kwa kutimiza ahadi ya kupeana vipakatalishi ili kuboresha elimu nchini.
“Hii leo tumepokea vipakatalishi 73 katika shule yetu na tunampongeza rais wetu kwa yale amefanya kuhakikisha viwango vya masomo vinainuka katika shule mbalimbali za humu nchini,” alisema Momanyi.
Miongoni mwa shule mbazo zilipokea vipakatalishi hivyo ni shule za msingi za Nyamira DEB, Nyamataro na Borabu huku shughuli hiyo ikiendelea kufanywa.