Bweni la shule ya upili ya wavulana ya Nduru iliyoko eneo bunge la Mugirango Kusini kaunti ya Kisii liliteketea na kusababisha hasara kubwa kwa wanafunzi wa shule hiyo.
Bweni lilichomeka ni la wanafunzi mayatima pekee ambalo linaitwa 'Mount Kenya', mkasa huo ulipelekea wanafunzi kupoteza vitabu, godoro, mablanketi na sare za shule.
Akitibithisha mkasa huo wa moto mkuu wa polisi wilayani Gucha Kusini Moses Kanye, alisema moto huo ulishika bweni la shule usiku wakati wanafunzi walikuwa darasani ila hakuna aliyejeruhiwa katika mkasa huo huku akisema wanafunzi walijaribu kuuzima moto huo lakini kwa bahati mbaya bidhaa zao hasikusazwa.
“Wanafunzi 100 ambao ni mayatima wamepoteza bidhaa zao kupitia mkasa wa moto ulioshika bweni lao na hadi sasa kiini haswa kilichosababisha mkasa huo hakijabainika,” alisema Kanye.
katika kaunti ya Kisii mabweni mengi ya shule za upili yameonekana yakiteketea katika siku za hivi karibuni jambo ambalo limewashangaza wengi.
Juma moja lililopita mabweni ya shule za wavulana na wasichana za Nyamagwa yalichomeka huku wakaazi wakiomba uchunguzi kufanywa.