Mwanamume mmoja ambaye uraia wake haujabainika alifikishwa Mahakani kule Thika siku ya Jumanne na kushtakiwa kwa kosa la kupatikana na vilipuzi.
Inadaiwa ya kwamba mwanamume huyo Ahmed Mohamed Abdilahi maarufu Arab alinaswa tarehe kumi na tatu mwezi jana akiwa na vilipuzi aina ya RDX katika kizuizi cha barabaran eneo la Makongeni kule Thika.
Mtuhumiwa huyo inadaiwa kwamba alikuwa ameficha vilipuzi hivyo chini ya kiti katika basi alilokuwa ameabiri aliponaswa kule Thika.
Baada ya uchunguzi ilibainika kwamba alikuwa ameacha vilipuzi vingine katika afisi za mabasi ya kampuni ya Meccar kule Mandera.
Abdilahi amefikishwa mbele ya Hakimu Lucy Mbugua ambapo alinyimwa dhamana huku Hakimu huyo akisema kwamba makosa kama hayo yana uzito ikizingatiwa hali ya usalama hapa nchini.
Kesi hiyo itaanza kusikilizwa tarehe ishirini mwezi ujao.