Mwanamme mmoja aliponea chupuchupu kuuawa na umati uliokuwa na ghadhabu baada ya kufumaniwa akichuna mahindi katika shamba Moja eneo la Molomuni kata ya Kaewa kaunti ndogo ya Kathiani.
Naibu wa chifu wa Kaewa Josphat Mawia alilazimika kuingilia kati na kuutawanya umati huo uliokuwa umemrarua nguo na kumwacha mshukiwa na majeraha.
Mawia alisema kuwa mwanamume huyo si mkaaji was eneo hilo, na ndipo wakazi walimvamia na kumpa kichapo cha mbwa walipompata shambani mwa mwenyewe akichuna mahindi.
Mawia alisema kuwa baadaye iligundulika kuwa mwanamume huyo hana akili timamu baada ya kufikishwa katika kituo cha polisi cha Kivaa.
Alielezea kuwa familia ya mwanamume huyo ilijulishwa pale ilifika na kumchukua, lakini Mawia aliwaonya wakazi dhidi ya kupenda kuchukua sheria mikononi mwao pale wanapomkamata mshukiwa.
"Si vyema watu kupenda kuchukua sheria mikononi mwao kwani huwa hawatendi haki kwa washukiwa," alisema Mawia.
Aidha aliwaomba wakazi hawa kuwa wakiwapeleka washukiwa katika vituo vya polisi ili sheria ifuate mkondo wake.