Mwanamume mmoja mwenye umri wa makamu katika kijiji cha Mochongwa wilayani Gucha kaunti ya Kisii ameuawa kwa kukatwakatwa kwa upanga baada ya kudaiwa kuwa mchawi.
Akithibitisha kisa hicho siku ya Jumatatu chifu wa lokesheni ya Kebere, Geoffrey Abuya alisema kuwa marehemu Kennedy Nyareru aliuawa baada ya kukatwakatwa na nduguze kwa madai kuwa amekuwa akiwaroga watoto wao.
Chifu Abuya alisema huenda kisa hicho kilikuwa kisingizio tu na huenda uhasama huo uliibuka kufuatia mzozo wa shamba katika familia hiyo ambayo imekuwa ikipigana ju ya mashamba kwa muda mrefu
“Marehemu alidaiwa kuwa amekuwa akiwaroga watoto wa ndugu zake ambao wamemuua hii leo,” alisema Abuya.
“Lakini huenda ni mzozo wa shamba maana wamekuwa wakipigania shamba kwa muda mrefu sana,” aliongeza Abuya.
Washukiwa hao waliotekeleza mauaji hayo walitoroka na hawajulikani waliko huku uchunguzi ukiendelea
Mwili wa marehemu ulipelekwa hadi chumba cha kuhifadhi maiti cha Gucha huku polisi wakiwasaka washukiwa hao wa mauaji.