Mwili wa mwanamume wa umri wa miaka 30 umepatikana ukininginia juu ya mti eneo la Katulu Kata ya Nguluni kaunti ndogo ya Matungulu kando ya barabara ya kutoka Nairobi kuelekea Kangundo.
Akidhibitisha kisa hiki, chifu wa kata ya Nguluni Johnbosco Ndambuki alisema kuwa mwili huo ulionekana na watoto waliokuwa wakienda shule Leo asubuhi.
"Marehemu hajatambulika alikotoka kwani hakuwa na stakabadhi ambazo zingetuwezesha kumtambua, aidha wakaazi wamekana kumjua," alisema Ndambuki.
Vilevile Ndambuki amewataka wenyeji kupiga ripoti kwa polisi iwapo watapata habari ambazo zinawezasaidia katika uchunguzi.
Mwili wa mwanamume huyo umechukuliwa na polisi na kupelekwa katika hifadhi ya maiti ya hospitali ya Kangundo level four huku polisi wakianzisha uchunguzi.