Gavana wa kaunti ya Kisii James Ongwae amesema atajaribu kila awezalo kuhakikisha ahadi alizotoa amezitimiza kikamilifu.
Hii ni baada ya Gavana Ongwae kuombwa kufanyia wakaazi wa kaunti hiyo maendeleo mengi kabla ya uchaguzi wa mwaka ujao.
Akizungumza mnamo siku ya Jumapili katika uwanja wa Nyamache eneo bunge la Bobasi kaunti ya Kisii, Ongwae alisema hajaridhika na maendeleo yale ambayo amefanya kufikia sasa tangu aingie mamlakani na kusema atafanya mengi zaidi katika kaunti hiyo.
“Mimi kama gavana wa Kisii nitahakikisha wakaazi wa kaunti hii wamenufaika zaidi na maenedeleo mengi ambayo nitafanya katika siku hizi ambazo zimesalia,” alisema Ongwae.
Wakati huo huo, Ongwae alisema miongoni mwa maendeleo ambayo atafanya ni kuunganisha miradi ya maji, ukarabati wa barabara miongioni mwa maendeleo mengine.
Aidha, Ongwae aliomba viongozi wote wa Kisii kushirikiana pamoja kufanya maendeleo katika kaunti hiyo kwani viongozi hujaguliwa kufanya maendeleo wala si lingine tofauti.
“Naomba viongozi wote wa kaunti tufanye kazi kwa upamoja haswa maendeleo ili kaunti yetu iwe mbele katika maendeleo,” aliongeza Ongwae.